ຕອນເຊົ້າວັນທີ 23 ມິຖຸນາ 2025 ນີ້ ຢູ່ທີ່ອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ. ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວພ້ອມຄະນະໄດ້ເດີນທາງມາຢ້ຽມຢາມ ແລະ ເຮັດວຽກຢູ່ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໂດຍການຕ້ອນຮັບຢ່າງອົບອຸ່ນຈາກທ່ານ ຄຳສະແຫວງ ວິໄລພົງ ຮັກສາການຫົວໜ້າອົົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳພ້ອມດ້ວຍສະພາການຄ້າ ແລະ ອຸດສາຫະກຳນະຄອນຫຼວງ, ແຂວງອຸດົມໄຊ, ແຂວງບໍ່ແກ້ວ, ຫ້ອງການສົ່ງເສີມການລົງທຶນສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ຫ້ອງການປິ່ນອ້ອມ ແລະ ພາກສ່ວນກ່ຽວຂ້ອງເຂົ້າຮ່ວມ. ກອງປະຊຸມທ່ານ ຄຳສະແຫວງ ວິໄລພົງ ຮັກສາການຫົວໜ້າອົງການຄຸ້ມຄອງບໍລິຫານເຂດເສດຖະກິດພິເສດສາມຫຼ່ຽມຄຳໄດ້ສະແດງຄວາມຍິນດີ ແລະ ກ່າວຕ້ອນຮັບຄະນະຜູ້ແທນດັ່ງກ່າວພ້ອມທັງສະເໜີແນະນຳບັນດາຫ້ອງການປິ່ນອ້ອມປະຈຳເຂດ ແລະ ສັງລວມລາຍງານການພັດທະນາເສດຖະກິດສັງຄົມພາຍໃນເຂດເສດຖະກິດພິເສດສາມຫຼ່ຽມຄຳໂດຍຫຍໍ້ຕໍ່ກອງປະຊູມ-ຊົມວີດີໂອພາບລວມ 18 ປີ ແຫ່ງການພັດທະນາເຂດເສດຖະກິດພິເສດສາມຫຼ່ຽມຄຳຮອດປະຈຸບັນ. ຈາກນີ້ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວກໍ່ໄດ້ສະແດງຄວາມຂອບໃຈ ແລະ ຮູ້ສຶກພາກພູມໃຈທີ່ໄດ້ການຕ້ອນຮັບຈາກຄະນະນຳຂອງອົງການຄຸ້ມຄອງບໍລິຫານເຂດເສດຖະກິດພິເສດສາມຫຼ່ຽມຄຳໃນຄັ້ງນີ້ ແລະ ສະແດງຄວາມໜ້າປະທັບໃຈຢ່າງຍິ່ງຕໍ່ກັບການພັດທະນາ, ການຄ້າ, ການລົງທຶນ, ການທ່ອງທ່ຽວ, ການແກ້ໄຂປະກົດການຫຍໍ້ທໍ້, ການຄຸ້ມຄອງແຮງງານຖືກຕ້ອງຕາມລະບຽບກົດໝາຍ ແນໃສ່ເຮັດໃຫ້ກົນໄກເສດຖະກິດໄດ້ມີການເຊື່ອມໂຍງທັງພາຍໃນ ແລະ ຕ່າງປະເທດ ແລະ ອື່ນໆ. ພ້ອມນີ້ກໍ່ໄດ້ຮັບຟັງການລາຍງານສະພາບການພັດທະນາດ້ານຕ່າງໆພາຍໃນເຂດເສດຖະກິດພິເສດສາມຫຼ່ຽມຄຳເປັນຕົ້ນແມ່ນການພັດທະນາພື້ນຖານໂຄງລ່າງ, ວຽກງານການຄ້າການລົງທຶນ, ການຄຸ້ມຄອງແຮງງານ, ການບໍລິການທຸລະກິດວຽກງານການທ່ອງທ່ຽວ, ກິດຈະກຳງານປະເພນີວັດທະນະທຳ, ວຽກງານກະສິກຳ, ການປູກ-ການລ້ຽງ ແລະ ອື່ນໆໃຫ້ແກ່ຄະນະຜູ້ແທນສະພາການຄ້າ ແລະ ອຸດສາຫະກຳນະຄອນຫຼວງ, ອຸດົມໄຊ ແລະ ແຂວງບໍ່ແກ້ວໄດ້ຮັບຊາບໂດຍຫຍໍ້. ຈາກນີ້ຕາງໜ້າຫ້ອງການສົ່ງເສີມ ແລະ ການລົງທຶນສະພາບໍລິຫານເຂດເສດຖະກິດພິເສດສາມຫຼ່ຽມຄຳກໍ່ໄດ້ນຳສະເໜີບັນດາໂຄງການລົງທຶນຕ່າງໆຢູ່ພາຍໃນເຂດ ເພື່ອເປັນບ່ອນອີງໃຫ້ນັກທຸລະກິດທັງພາຍໃນ ແລະ ຕ່າງປະເທດທີ່ມີຄວາມສົນໃຈເຂົ້າມາລົງທຶນຮ່ວມຢູ່ພາຍໃນເຂດເສດຖະກິດພິເສດສາມຫຼ່ຽມຄຳເຊັ່ນ: ໂຄງການກໍ່ສ້າງພະເຈົ້າໃຫຍ່ເມືອງເກົ່າສຸວັນນະໂຄມຄຳເທິງພູກິ່ວລົມ, ໂຄງການກໍ່ສ້າງພະພຸດທະຮູບສັກສິດຂອງພຸດທະສາສະໜາພູກິ່ວລົມ, ໂຄງການກໍ່ສ້າງສະໜາມກ໊ອຟ 36 ຫຼູມເທິງພູກິ່ວລົມ, ໂຄງການບັນເທີງຫວັນກົ່ວຟູຢູ່ຕະຫຼາດວັດທະນະທຳນາໆຊາດ, ໂຄງການກໍ່ສ້າງບໍ່ນ້ຳພຸຮ້ອນ, ທີ່ມີທີ່ພັກ, ໂຮງແຮມ, ສະຖານທີ່ບໍລິການຜ່ອນຄາຍບຳລຸງຮັກສາສຸຂະພາບ, ຮ້ານອາຫານ, ຮ້ານຂາຍເຄື່ອງທີ່ລະນຶກ, ໂຄງການສ້າງໂຮງງານຕັດຫຍິບເສື້ອຜ້າ, ໂຄງການກໍ່ສ້າງສູນກາງໂຮງຮຽນວັດທະນະທຳ ແລະ ອື່ນໆ. ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ພັດປ່ຽນກັນປະກອບຄຳຄິດເຫັນແລກປ່ຽນບົດຮຽນໃນການສຶກສາຂໍ້ມູນດ້ານກົນໄກເສດຖະກິດ-ການຄ້າຮ່ວມກັນລະຫວ່າງສູນກາງ, ບັນດາແຂວງ ແລະ ເຂດເສດຖະກິດພິເສດສາມຫຼ່ຽມຄຳ ໃນການພັດທະນາວຽກງານການຄ້າ ແລະ ອຸດສາຫະກຳການສົ່ງອອກ ແລະ ນຳເຂົ້າ, ການບໍລິການ, ການລົງທຶນ, ການທ່ອງທ່ຽວ ແລະ ອຶື່ນໆຢ່າງກົງໄປກົງມາ ເພື່ອແນໃສເປັນການແລກປ່ຽນບົດຮຽນດ້ານກົນໄກເສດຖະກິດຢູ່ສູນກາງ ແລະ ທ້ອງຖິ່ນໃຫ້ໄດ້ຮັບການເຊື່ອມໂຍງໂດຍອີງໃສ່ທ່າແຮງທີ່ບົ່ມຊ້ອນໃນທ້ອງຖິ່ນໃຫ້ມີຄວາມເຂັ້ມແຂງຍືນຍົງ, ຮັບປະກັນຄຸນນະພາບທີ່ດີໃຫ້ມີບາດກ້າວອັນໃໝ່ໃນອະນາຄົດ ແລະ ຍາວນານອີກດ້ວຍ. ພາຍຫຼັງສຳເລັດກອງປະຊຸມຄະນະຜູ້ແທນການຄ້າ ແລະ ອຸດສາຫະກຳກໍ່ໄດ້ໄປກາບໄຫວ້ພະເຈົ້າອົງຫຼວງວັດທອງທິບພັດທະນາລາມ, ຢ້ຽມຢາມຟາມງົວ, ສະຖານທີ່ປູກຜັກເຮືອນຮົ່ມ ແລະ ສືບຕໍ່ເດີນທາງກັບຄືນນະຄອນຫຼວງວຽງຈັນທີ່ສະໜາມບິນສາກົນບໍ່ແກ້ວດ້ວຍຄວາມສະຫວັດດີພາບ.

ເນື່ອງໃນໂອກາດວັນສາກົນຕ້ານຢາເສບຕິດຄົບຮອບ 38 ປີ ໃນຕອນບ່າຍຂອງວັນທີ 26 ມິຖຸນາ 2025 ທີ່ເຂດເສດຖະກິດພິເສດສາມຫຼ່ຽມຄຳໄດ້ຈັດມີກອງປະຊຸມສຳມະນາສຶກສາຕ້ານຢາເສບຕິດຂຶ້ນໂດຍການເຂົ້າຮ່ວມຂອງທ່ານ ຄຳສະຫວາດແກ້ວປັນຍາ ຮອງຫົວໜ້າອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ, ທ່ານ ພັອ ວິພາກອນ ສິງຈັນທາ ຮອງຫົວໜ້າກອງບັນຊາການປ້ອງກັນຄວາມສະຫງົບເຂດເສດຖະກິດພິເສດສາມຫຼ່ຽມຄຳ, ທ່ານ ພັທ ລຸນຜາຍ ຄຳທະວີວົງ ຮອງຫ້ອງຕຳຫຼວດກອງບັນຊາການປ້ອງກັນຄວາມສະຫງົບແຂວງບໍ່ແກ້ວ, ຕາງໜ້າສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ມີບັນດາພະນັກງານ, ອ້າຍນ້ອງຕຳຫຼວດ, ຫົວໜ່ວຍທຸລະກິດ, ບໍລິສັດ, ພໍ່ຄ້າຊາວຂາຍ, ຄູ່ອາຈານ ແລະ ນ້ອງນ້ອຍນັກຮຽນ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ. ໂອກາດນີ້ທ່ານ ຄຳສະຫວາດ ແກ້ວປັນຍາ ຮອງຫົວໜ້າອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳກໍ່ໄດ້ໃຫ້ກຽດກ່າວເປີດງານຢ່າງເປັນທາງການ ແລະ ໄດ້ໃຫ້ນິຍາມວ່າ: “ຢ່າເສບຕິດເປັນບັນຫາອັນໃຫຍ່ຫຼວງທີ່ທ່ວງດຶງການພັດທະນາປະເທດຊາດ ແລະ ກໍ່ໃຫ້ເກີດຄວາມບໍ່ສະຫງົບຢູ່ໃນສັງຄົມ” ຕະຫຼອດໄລຍະແຫ່ງການສ້າງສາ ແລະ ປົກປັກຮັກສາປະເທດຊາດ, ພັກ ແລະ ລັດຖະບານກໍ່ໄດ້ຖືເອົາວຽກງານຕ້ານຢາເສບຕິດເປັນວຽກງານສຳຄັນໃນການຈັດຕັ້ງປະຕິບັດປ້ອງກັນ ແລະ ປາບປາມໃຫ້ນັບມື້ນັບຫຼຸດໜ້ອຍຖອຍລົງ. ຈາກນີ້ທ່ານ ພັອ ວິພາກອນ ສິງຈັນທາ ຮອງຫົວໜ້າກອງບັນຊາການປ້ອງກັນຄວາມສະຫງົບເຂດເສດຖະກິດພິເສດສາມຫຼ່ຽມຄຳ ກໍ່ໃຫ້ກຽດຂື້ນບັນຍາຍ ແລະ ລາຍງານສະພາບບັນຫາຢາເສບຕິດຢູ່ພາຍໃນເຂດ, ໄດ້ສະຫຼຸບບາງຜົນງານອັນພົ້ນເດັ່ນ, ຖອດຖອນບົດຮຽນວ່າດ້ວຍການແກ້ໄຂບັນຫາຢາເສບຕິດໃນໄລຍະຜ່ານມາອັນມີຜົນສຳເລັດຫຼາຍດ້ານ. ພ້ອມນີ້ທ່ານ ພັທ ລຸນຜາຍ ຄຳທະວີວົງ ຮອງຫ້ອງຕຳຫຼວດກອງບັນຊາການປ້ອງກັນຄວາມສະຫງົບແຂວງບໍ່ແກ້ວກໍ່ໄດ້ຂື້ນລາຍງານແລກປ່ຽນສະພາບຢາເສບຕິດຂອງແຂວງບໍ່ແກ້ວໂດຍສະເພາະແມ່ນວຽກງານການປາບປາມ, ການຈັບກຸ່ມຄ້າຂາຍຢາເສບຕິດປະເພດຕ່າງໆ, ການແກ້ໄຂ ແລະ ມ້າງຄະດີ, ການຈູດທຳລາຍ, ວຽກງານໂຄສະນາ, ວຽກງານສູນບຳບັດຢາເສບຕິດ ແລະ ອື່ນໆ. ການຈັດກອງປະຊຸມໃນຄັ້ງນີ້ບໍ່ພຽງແຕ່ເປັນການລາຍງານສະພາບບັນຫາຢາເສບຕິດໃນສັງຄົມເທົ່ານັ້ນທ່ານ ຮອ ພອນປະເສີດ ບົວພັນທອງ ຮອງຫົວໜ້າພະແນກຕຳຫຼວດສະກັດກັ້ນ ແລະ ຕ້ານຢາເສບຕິດເຂດເສດຖະກິດພິເສດສາມຫຼ່ຽມຄຳກໍ່ໄດ້ຂື້ນແນະນຳໃຫ້ຄວາມຮູ້ກ່ຽວກັບການໂຄສະນາຜົນຮ້າຍ ແລະ ໄພອັນຕະລາຍຂອງຢາເສບຕິດແຕ່ລະເພດທີ່ພົບພໍ້ໃນສັງຄົມ. ເພື່ອຈັດຕັ້ງປະຕິບັດຕາມແນວທາງການຄວບຄຸມຢາເສບຕິດໃຫ້ເຂັ້ມງວດ ແນໃສ່ເພີ່ມຄວາມຮູ້ແກ່ນ້ອງນ້ອຍເຍົາວະຊົນ, ພໍ່ແມ່ປະຊາຊົນທຸກຊັ້ນຄົນໃຫ້ເຂົ້າໃຈຢ່າງເລິກເຊິ່ງຕໍ່ກັບຜົນກະທົບ ແລະ ຜົນຮ້າຍຂອງຢາເສບຕິດ, ເປັນການປູກຈິດສຳນຶກໃຫ້ໄວໜຸ່ມເພື່ອຕໍ່ຕ້ານ ແລະ ບໍ່ເຂົ້າໄປຫຍຸ້ງກ່ຽວກັບຢາເສບຕິດ, ສ້າງສະພາບແວດລ້ອມອັນດີ, ຄຳນຶງເຖິງຄວາມປອດໄພ ແລະ ອະນາຄົດອັນສົດໃສຂອງໝົດທຸກຄົນໃນສັງຄົມ. ຈາກນີ້ຍັງເປີດໂອກາດໃຫ້ຜູ້ເຂົ້າຮ່ວມເຮັດກິດຈະກຳຖາມ-ຕອບກ່ຽວກັບຢາເສບຕິດເພີ່ມທະວີຄວາມເຂົ້າໃຈຢ່າງຖືກຕ້ອງ, ການປະຕິດເສດ, ວິທີປ້ອງກັນເພື່ອໃຫ້ທຸກຄົນຫ່າງໄກຈາກຢາເສບຕິດອີກດ້ວຍ.

ໃນຕອນເຊົ້າວັນທີ 26 ມີຖຸນາ 2025 ນີ້ ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜີ້ງ ແຂວງບໍ່ແກ້ວ ໄດ້ຈັດກິດຈະກຳຍ່າງເພື່ອສຸຂະພາບ ເນື່ອງໃນໂອກາດວັນສາກົນຕ້ານຢາເສບຕິດ ຄົບຮອບ 38 ປີ (26 ມິຖຸນາ 1987-26 ມິຖຸນາ 2025) ໂດຍເປັນກຽດເຂົ້າຮ່ວມຂອງ ທ່ານ ຄຳສະແຫວງ ວິໄລພົງ ຮັກສາການຫົວໜ້າອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ, ທ່ານ ຫລີຈ້າວ ຜູ້ອຳນວຍການສູນພັດທະນາວັດທະນະທຳ ແລະ ການທ່ອງທ່ຽວ ສະພາເຂດເສດຖະກິດພິເສດສາມຫຼ່ຽມຄຳ, ທ່ານ ພັອ ອານຸສີນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ, ມີພະນັກງານ, ຄູອາຈານ, ນ້ອງນັກຮຽນ ຕະຫຼອດຮອດມວນຊົນ ແລະ ພາກສວນກ່ຽວຂ້ອງເຂົ້າຮ່ວມຢ່າງເປັນຂະບວນຟົດຟື້ນ. ສຳລັບກິດຈະກຳຍ່າງເພື່ອສຸຂະພາບ ເນື່ອງໃນໂອກາດ ວັນສາກົນຕ້ານຢາເສດຕິດ ຄົບຮອບ 38 ປີ ຄັ້ງນີ້ ແມ່ນໄດ້ເລີ່ມຍ່າງ ອອກຈາກສະໜາມກິລາໂຮງຮຽນດອກງີ້ວຄໍຳ ນໍຳຂະບວນໂດຍນ້ອງນັກຮຽນ ຕາມດ້ວຍຂະບວນຂອງກຳລັງ ປກສ ເຂດເສດຖະກິດພິເສດສາມຫຼ່ຽມຄຳ, ຂະບວນອົງການຄະນະຄຸ້ມຄອງເຂດເສດຖະກິດພິເສດສາມຫຼ່ຽມຄຳ, ກຸ່ມບໍລິສັດດອກງີ້ວຄຳ, ພະນັກງານ, ຜູ້ປົງຄອງນັກຮຽນ ແລະ ພາກສ່ວນອື່ນໆ ແລ້ວເຄື່ອນຂະບວນຍ່າງຕາມເສັນທາງມິດຕະພາບ ລາວ-ຈີນ ອ້ອມໂຮງແຮມ ດອກງີ້ວຄຳ ແລ້ວລ້ຽວຂວາກັບມາສະໜາມກິລາໂຮງຮຽນດອກງີ້ວຄຳ ເປັນອັນວ່າສຳເລັດກິດຈະກຳ. ການຈັດກິດຈະກຳຍ່າງເພື່ອສຸຂະພາບໃນຄັ້ງນີ້ ເພື່ອເປັນການສົ່ງເສີມດ້ານສຸຂະພາບ, ປູກຈິດສຳນຶກທີ່ດີ ໃຫ້ທຸກພາກສ່ວນໃນສັງຄົມ ຈົ່ງຄຳນຶງເຖີງຜົນຮ້າຍໄພອັນຕະລາຍຂອງຢາເສບຕິດ ໃຫ້ຫັນມາໃສ່ໃຈສຸຂະພາບຂອງຕົນ ແລະ ບໍ່ໄປຫຍຸ້ງກ່ຽວກັບຢາເສບຕິດຢາເສບຕິດ ພ້ອມກັນສ້າງສາພັດທະນາປະເທດຊາດ ເຮັດໃຫ້ເຍົາວະຊົນ-ໄວໜຸ່ມ ຫາງໄກຢາຢາເສບຕິດ ທີ່ເປັນຜິດເປັນໄພ ຜູ້ເສບຕາຍ ຜູ້ຂາຍຕິດຄຸກ ຜູ້ທຸກໃຈຄືຄອບຄົວ ແລະ ສັງຄົມ.

ວັນທີ 27 ມິຖຸນາ 2025, ເຂດເສດຖະກິດພິເສດສາມຫຼ່ຽມຄຳຂອງລາວ ໄດ້ຈັດພິທີວາງສີລາລຶກໂຄງການກໍ່ສ້າງບໍ່ນ້ຳພຸຮ້ອນປຸ່ງເລາະ ທໍ່ສົ່ງນ້ຳຍາວເກືອບ 50 ກິໂລແມັດ ໄດ້ຖືກນຳມານຳໃຊ້ຢ່າງເປັນທາງການ, ສຳເລັດການນຳສົ່ງນ້ຳພຸຮ້ອນທຳມະຊາດປຸ່ງເລາະເຖິງເຂດເສດຖະກິດພິເສດສາມຫຼ່ຽມຄຳ, ຮັບປະກັນແຫຼ່ງຊັບພະຍາກອນຫຼັກແກ່ເຂດເສດຖະກິດພິເສດສາມຫຼ່ຽມຄຳ ເພື່ອສ້າງໂຄງການທ່ອງທ່ຽວນ້ຳພຸຮ້ອນ.

ທ່ານ ທອງຈັນ ມະນີໄຊ ເຈົ້າແຂວງໆບໍ່ແກ້ວ, ທ່ານ ຄຳພະຫຍາ ພົມປັນຍາ ຮອງເຈົ້າແຂວງໆບໍ່ແກ້ວ, ທ່ານ ກ່າວ ຫຼົງ ຮອງປະທານສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ທ່ານ ເວີ້ຍ ຈ້ຽນ ອຳນວຍການກຸ່ມບໍລິສັດດອກງິ້ວຄຳ ຈຳກັດ, ທ່ານ ຢາງ ຢົ່ງ ຜູ້ຮັບຜິດຊອບຂອງບໍລິສັດບຳລຸງຮັບສາສຸຂະພາບຊານຕົງຈູນຊ້ວງ ຈຳກັດ, ພ້ອມດ້ວຍຜູ້ຕາງໜ້າບັນດາຫ້ອງການປິ່ນອ້ອມ ເຂົ້າຮ່ວມເປັນສັກຂີພິຍານໃນຜົນສຳເລັດຄັ້ງນີ້

ນ້ຳພຸຮ້ອນປຸ່ງເລາະມີຄຸນນະປະໂຫຍດຫຼາກຫຼາຍ, ມີກົດອາຊິດເມຕາຊີລິຊິກທຳມະຊາດ, ອຸດົມສົມບູນໄປດ້ວຍທາດຕ່າງໆທີ່ເປັນປະໂຫຍດຕໍ່ຮ່າງກາຍຂອງມະນຸດ, ເຊິ່ງສູງກວ່າມາດຕະຖານຂອງຈີນ 4 ເທົ່າ, ມີປະໂຫຍດທາງການແພດ, ມີຄຸນນະສົມບັດຫຼາຍຢ່າງເຊັ່ນ: ການສົ່ງເສີມສຸຂະພາບຫົວໃຈ ແລະ ລອດເລືອດ, ເສີມສ້າງກະດູກ ແລະ ບຳລຸງຜິວພັນ.

ອຸນຫະພູມນ້ໍາໃນບໍ່ນ້ຳຮ້ອນປຸ່ງເລາະແມ່ນສູງເຖິງ 90 ອົງສາ, ພາຍຫຼັງໄດ້ຂົນສົ່ງໄປເຂດເສດຖະກິດພິເສດສາມຫຼ່ຽມຄຳຜ່ານທໍ່ສົ່ງ 47,45 ກິໂລແມັດ, ຍັງສາມາດຮັກສາອຸນຫະພູມໄດ້ປະມານ 60 ອົງສາ. ປະລິມານນ້ຳໃນແຕ່ລະວັນມີຄວາມໝັ້ນຄົງຢູ່ທີ່ 2,000-3,000 ແມັດກ້ອນ, ເຊີ່ງຖືເປັນການວາງພື້ນຖານທີ່ໝັ້ນຄົງໃຫ້ແກ່ການພັດທະນາ ແລະ ນຳໃຊ້ໄດ້ພຽງພໍໃນຕໍ່ໜ້າ.

ທ່ານ ທອງຈັນ ມະນີໄຊ ເຈົ້າແຂວງໆບໍ່ແກ້ວ ໄດ້ສະແດງຄວາມຍ້ອງຍໍຊົມເຊີຍກັບຜົນສຳເລັດໂຄງການ ແລະ ເປັນ “ໂຄງການພັດທະນາການທ່ອງທ່ຽວທີ່ມີຄວາມໝາຍຍຸດທະສາດ” ຂອງແຂວງ. ທ່ານໄດ້ກ່າວວ່າ: ໂຄງການດັ່ງກ່າວ ປະສົບຜົນສຳເລັດໃນການຫັນປ່ຽນແຫຼ່ງຊັບພະຍາກອນບໍ່ນ້ຳຮ້ອນທີ່ເປັນເອກະລັກສະເພາະຂອງແຂວງ ໄປສູ່ການແຂ່ງຂັນດ້ານອຸດສາຫະກຳການທ່ອງທ່ຽວທີ່ແທດເໝາະ, ເປັນການຍົກສູງຖານະຂອງເຂດເສດຖະກິດພິເສດພິເສດສາມຫຼ່ຽມຄຳ ແລະ ແຂວງບໍ່ແກ້ວໃນຕະຫຼາດການທ່ອງທ່ຽວ. ທ່ານຍັງໄດ້ເຊື້ອເຊີນນັກທ່ອງທ່ຽວຈາກທົ່ວທຸກມຸມໂລກຢ່າງອົບອຸ່ນວ່າ: "ໃນອະນາຄົດ, ຂໍເຊີນຊວນບັນດາທ່ານເຂົ້າມາສໍາຜັດກັບສະເໜ່ຂອງນ້ຳພຸຮ້ອນປຸ່ງເລາະ ແລະ ແບ່ງປັນຄວາມສຸກຈາກທໍາມະຊາດບ່ອນພັກຜ່ອນຂອງພາກເຫນືອຂອງລາວ!"

ທ່ານ ຢາງ ຢົ່ງ ຜູ້ຮັບຜິດຊອບຂອງບໍລິສັດບຳລຸງຮັບສາສຸຂະພາບຊານຕົງຈູນຊ້ວງ ຈຳກັດ ຜູ້ຮັບເໝົາໂຄງການ, ກ່າວໃນຄຳປາໄສຂອງທ່ານວ່າ ນ້ຳພຸຮ້ອນປຸ່ງເລາະທີ່ມີຄຸນນະພາບສູງແມ່ນຫາຍາກໃນໂລກ. ທີມງານໂຄງການໄດ້ເອົາຊະນະສະພາບແວດລ້ອມອັນຫຍຸ້ງຍາກ ແລະ ຄວາມກົດດັນດ້ານເວລາໂດຍຜ່ານການສຳຫຼວດທີ່ຊັດເຈນ, ການເລືອກໃຊ້ວັດສະດຸທໍ່ທີ່ມີປະສິດຕິພາບສູງ, ປັບປຸງໂຄງສ້າງທໍ່ຢ່າງມີຫຼັກການວິທະຍາສາດ, ຮັບປະກັນຄຸນນະພາບ ແລະ ຄວາມສະຖຽນໃນການສົ່ງມອບນ້ໍາພຸຮ້ອນ, ຄວາມຍາວຂອງທໍ່ນ້ໍາຮ້ອນຍັງສ້າງສະຖິຕິໃໝ່ໃນອຸດສາຫະກໍາ. ທ່ານ ຢາງ ຢົ່ງ ເນັ້ນໜັກວ່າ: ໂຄງການທໍ່ສົ່ງນ້ຳຮ້ອນປຸ່ງເລາະບໍ່ພຽງແຕ່ແມ່ນຜົນສຳເລັດຂອງການຮ່ວມມືລາວ-ຈີນເທົ່ານັ້ນ, ຫາກຍັງເປັນມິດຕະພາບອັນດີງາມຂອງລາວ-ຈີນອີກດ້ວຍ.

ທ່ານ ເວີ້ຍ ຈ້ຽນ ອຳນວຍການກຸ່ມບໍລິສັດດອກງິ້ວຄຳ ຈຳກັດໃຫ້ຮູ້ວ່າ: “ທໍ່ສົ່ງນ້ຳພຸຮ້ອນ” ນີ້ຂ້າມພູເຂົາ ແລະ ແມ່ນ້ຳ, ນຳນ້ຳພຸຮ້ອນທີ່ມີມູນຄ່າການພັດທະນາອັນໃຫຍ່ຫຼວງເຂົ້າມາສູ່ຕົວເມືອງ, ແມ່ນບາດກ້າວສຳຄັນໃນການຫັນປ່ຽນ ແລະ ພັດທະນາເຂດເສດຖະກິດພິເສດສາມຫຼ່ຽມຄຳໃນຕໍ່ໜ້າ, ເຂດເສດຖະກິດພິເສດສາມຫຼ່ຽມຄຳຈະຊອກຫາວິທີການນຳໃຊ້ນ້ຳຮ້ອນໃຫ້ເກີດປະໂຫຍດ, ຊຸກຍູ້ການເຄື່ອນໄຫວເຂົ້າໃນບັນດາຂະແໜງການຮັກສາສຸຂະພາບນ້ຳຮ້ອນ ແລະ ການທ່ອງທ່ຽວພັກຜ່ອນ, ຟື້ນຟູບັນດາອຸດສາຫະກຳທີ່ກ່ຽວຂ້ອງ, ຊຸກຍູ້ການຊອກວຽກເຮັດງານທຳ, ຊ່ວຍສ້າງເມືອງທີ່ທັນສະໄໝເໝາະສົມແກ່ການດຳເນີນທຸລະກິດ, ການດຳລົງຊີວິດ ແລະ ການທ່ອງທ່ຽວ.

ໃນຕອນທ້າຍພິທີ, ພາຍໃຕ້ການເອົາໃຈໃສ່ຂອງແຂກທຸກພາກສ່ວນ, ພິທີສຳເລັດໂຄງການທໍ່ສົ່ງນໍ້າຮ້ອນປຸ່ງເລາະໄດ້ຈັດຂຶ້ນຢ່າງເປັນທາງການ.